جايك — سياسة الخصوصية

منو إحنا

«جايك» خدمة نقل بالتكتك وتوصيل بضائع داخل قضاء المسيب — محافظة بابل، العراق. هذي الصفحة تشرح شنو معلومات ناخذها منك، وليش، وشلون تتحكم بيها.

رقم الموبايل والاسم: حتى نسوي حسابك ونتأكد منه بكود، ويعرف السائق منو طلب.
موقعك على الخريطة: نقطة الانطلاق والوصول حتى يلگيك السائق وتنحسب الأجرة.
أماكنك المحفوظة: إذا حفظت البيت أو الشغل، نخزّن الاسم والعنوان حتى تطلب بضغطة. تگدر تحذفها بأي وقت.
موقع السائق: يُرسل وتطبيقه مفتوح، حتى تشوفه جاي إلك ويعرف الطريق.
صور السائق: صورة شخصية وصورة المركبة وصورة هوية — للتحقق قبل الموافقة على السائق.
سجل طلباتك: الوقت والمسافة والأجرة والتقييم.
اشتراك الإشعارات: حتى توصلك حالة طلبك والتطبيق مسكّر.

ما ناخذ: ما نطلب أي معلومة بنكية أو بطاقة دفع — الدفع نقداً بين الزبون والسائق. وما نتابع موقعك والتطبيق مسكّر.

السائق اللي يقبل طلبك: يشوف اسمك ورقمك وموقعك — حتى يوصلك ويتصل بيك.
إنت كزبون: تشوف اسم السائق وصورته وصورة تكتكه وموقعه ورقمه. صور الهوية ما تطلع للزبائن أبداً.
إدارة جايك: تشوف الطلبات والحسابات لإدارة الخدمة وحل الشكاوى.

ما نبيع معلوماتك ولا نأجّرها لأي جهة إعلانية.

معلومات حسابك تبقى ما دام حسابك شغّال. سجل الطلبات يبقى للمحاسبة مع السواق، وبعد حذف حسابك ينشال منه اسمك ورقمك ويبقى بلا هوية.

تكدر تحذف حسابك من داخل التطبيق:

ينحذف: اسمك، رقمك، مواقعك المحفوظة، مكافآتك، اشتراك الإشعارات، وصور السائق. ويبقى سجل الطلبات بلا اسم ولا رقم لأنه سجل مالي يخص الطرف الثاني.

تكدر هم تطلب الحذف بمراسلتنا، ونسويه خلال ٧ أيام.

الاتصال بالتطبيق مشفّر (HTTPS)، والدخول بكود يوصل لموبايلك، وكل حساب إله مفتاح خاص ما يكدر غيره يستعمله. الوصول لقاعدة البيانات محصور بإدارة جايك.

الخدمة للكبار (١٨ سنة فما فوق). ما نسوي حسابات للأطفال عن قصد.

لأي سؤال عن خصوصيتك أو طلب حذف: تواصل معنا من صفحة «الاتصال بالدعم» داخل التطبيق، أو على واتساب الرقم المعروض بنفس الصفحة.

إذا غيّرنا هذي السياسة، راح نحدّث التاريخ أعلاه ونعلمكم داخل التطبيق.